heimen的部落格

平日出街食西餐為多，
呢日行開尖沙咀廣東道，
見到呢間六合小廚，
有多款中菜揀，店員落力推薦，
上網搵過亦有唔少好評，一於試試～

六合小廚位於尖沙咀廣東道海威商業中心7樓，
地方寬敞，設卡位亦有大檯，
企理潔淨又舒適，而且店員熱情好客。

餐牌種類選擇眾多，
有雞煲、羊腩煲、燒味、咖哩、
車仔麵、鮮茄米線、川辣菜、甜品等，
而且有二人、四人、八人套餐，
真係超多選擇，套餐價錢又相宜，抵食！

今晚決定試試二人套餐 HK$228
有明火例湯兩碗、欖菜肉碎四季豆、
咖哩牛腩煲、蠔油菜心、白飯兩碗。

明火例湯為蓮藕排骨湯，
湯料甚多，味道香濃，
好岩秋冬養生，
補益脾胃、滋陰潤燥～

蠔油菜心
菜心翠綠鮮甜，配蠔油有另一番風味。

欖菜肉碎四季豆
一上枱就已經芳香撲鼻，
欖菜好惹味，肉碎幼滑有咬口，
四季豆青綠爽脆，拌飯一流！

咖哩牛腩煲
口感濃郁厚重，
燜煮得十分入味，
牛腩煮得剛好，
唔會韌，口感一流！

白飯煮得香鬆又軟，
忍唔住食哂成碗～

另加秘制沙拉豬扒 HK$88
酸酸甜甜好開胃，
豬扒肉質鬆軟有彈性，
啖啖肉實在無比滿足！

最後飲返杯茶記必點香濃熱奶茶，
為是夜晚餐畫上完美句號。